Бүгүн бэс ыйын 7 күнүгэр, Аар саарга аатырбыт олоҥхоһут Дмитрий Михайлович Говоров — Олоҥхоһут Миитэрэй төрөөбүтэ 175 сылынан Хоро нэһилиэгин олохтооҕо, олоҥхону толорооччу Бурцев Афанасий Петрович — Бөскөй Бөҕө «Оҕустаах Охонооһой Олоҥхолоох айана» бырайыагынан сарсыарда 7:00 чаастан Тумултан араҕан күнүс 14:00 чааска Саһылыкааҥҥа кэллэ.
Олоҥхоһут Охонооһу олохтоохтор бөһүөлэккэ киириигэ көрсөн арыылаах алаадьынан, кырылыы кыынньыбыт кымыһынан айах туттулар. Нэһилиэнньэни кытта көрсүһүү 17:00 чаастан «Сайдам» сынньалаҥ киинигэр буолла. Көрсүһүүгэ Афанасий Петрович «Оҕустаах Охонооһой Олоҥхолоох айана» бырайыак уонна Саха көлүүр оҕуһун туһунан ирэ-хоро кэпсээтэ уонна айанын сүрүн сыалын толорон «Эрчимэн Бэргэн» олоҥхоттон быһа тардыыны иһитиннэрдэ.
Бүгүҥҥү тэрээһиҥҥэ мустубуттар олоҥхо истэн, оҕолуун уруулуун оҕус миинэн, хаартыскаҕа түһэн астынан тарҕастылар.
Олоҥхоһут Бурцев А.П. — Бөскөй Бөҕө, оҕуһунаан «Уолчаанныын» сарсыҥҥы айаннарын хайысхата Сыырдаах бөһүөлэгэ.
