Суотту нэһилиэгэр ахсынньы 6-9 күннэригэр Саха Республикатын үтүөлээх артыыһа, 20 сыл вокал уһуйааччытынан үлэлээбит опыттаах, 20 араас дойду сценаларыгар 30 араас омук тылынан ыллаан көрөөччү биһирэбилин ылбыт, Саха сирин киэҥ эйгэҕэ таһаарбыт, нарын-намчы, кэрэ куоластаах Екатерина Саввинова-Саина «Тыын, ыллаа» курсун иһинэн ыытар «Саҥа тыын» авторскай проегынан үлэлээтэ. Билиҥҥи уустук кэмҥэ дьону-сэргэни түмэн дууһаларын ырыанан ыраастаан, сөпкө тыыныны үөрэтэн бэйэҕэ холкутутууну, саҥа тыыны, саҥа сүүрээни киллэрдэ. Дьарык түмүгэр йога, цигун, Стрельникова тыынар ньымаларынан доруобуйаларын тупсарарга, айылҕа куолаһынан өбүгэлэри кытта ситими олохтуурга, тыын кэҥээн стресс сүтэрэргэ олус истиҥ, туһалаах сүбэтин ылынан хааллылар Суоттулар. Ахсынньы 9 күнүгэр «Мичээр» сынньалаҥ киинигэр хаһан да сценаҕа соҕотохтуу ыллаабатах дьоммут Саинаҕа уһуйуллан биир тыыҥҥа киирэн, баҕа санааларын толорон Екатерина Саввинова-Саиналыын холбоһуктаах концеры ыалдьыттарыгар бэлэхтээтилэр. Саргылаах сарсыҥҥыны салайа тутан, сырдыгынан сыдьаайан, уҕараабат уйгуну-быйаҥы тарда эрэ сырыт диэн баҕа санаалаах Махтал мааны тылларын анаатылар уһуйааччыларыгар Саинаҕа.
