Үтүө киэһэнэн, күндү көрөөччүлэр!..” – маннык тыллары бу хамсык ыарыы туран элбэх кыттааччылаах да, көрөөччүлээх да концерт көрбөтөхпүт олус ыраатта. Онтон бүгүн Суотту нэһилиэгэр кулун тутар 4 күнүгэр “Суоттутааҕы “Мичээр” СК” МБТ Хоноҕордооҕу “Түһүлгэ” сынньалаҥ киинигэр Россия норуоттарын култуураларын нэһилиэстибэтин, Саха сирин Автономията төрүттэммитэ 100, Саха республикатыгар Ийэ, Уус-Алдан улууһугар Патриотизм сылларын үөрүүлээх арыллыытын тэрийэн бэрт сэргэх тэрээһини ыытта.
Быыс арылынна… Автономия 100 сылыгар анаан Суотту орто оскуолатын үөрэнээччилэринэн туруоруллубут литературнай монтаһынан, Саха республикатын гимнын көрөөччүлэрдиин сүһүөхтэригэр туран патриотизм сырдык тыынынан саҕаланна. Салгыы Суотту нэһилиэгин депутаттарын Сэбиэтин 2021 с. 96-7 №-дээх ахсынньы 21 күнүнээҕи быһаарыытынан Суотту нэһилиэгин анал бэлиэтэ бигэргэммитин туһунан сырдатылынна, олохтоох автор, мелодист Георгий Говоров суруйуутугар Филипп Габышев оранжировкатыгар “Суотту вальса” ырыаны 2018 сыллаахха “Эн сулускун” республиканскай ырыа проегын кыттыылааҕа, улуус, республика конкурстарын лауреата Лена Заровняева ыллаан көрөөччүнү долгутта, уйадытта. Бу киэһэ өрүү инники сылдьар, көхтөөх, кырдьары билиммэт эдэрдии эрчимнээх, төрүт культуурабытын, сиэрбитин-туоммутун тарҕата сылдьар “Илгэ” фольклорнай ансамбль “Ыҥырыы кэлэрин тухары…” диэн ырыаларын ыллаан “Бис!”, “Браво!” ытыс тыаһынан эҕэрдэни туттулар. “Илгэ” ансамблы төрүттэспит, уостан түспэт кэрэ ырыалары айбыт ытык кырдьаҕаспыт Мария Федорова Ийэ сылыгар, кыыс оҕоҕо анаан бэйэтэ айбыт ырыатынан эҕэрдэлээтэ. Бүгүн манна олохтоох автор, мелодист Анастасия Степанова айбыт икки сабыс саҥа ырыалара сүрэхтэннэ. Саханы аан дойдуга аатырдыбыт убайдыы-быраат Көстөкүүнэптэр, Суотту 21 спордун маастардарын кэккэ инники күөҥҥэ сылдьар ыччаттарбытыгар анаан “Эр бэрдэ” ырыаны толордулар автордар — Иннокентий Портнягин, Филипп Габышев. Суотту нэһилиэгин автордарын бииртэн биир кэрэ ырыалара ылланна. Нэһилиэкпит үбүлүөйдээх тэрилтэлэрэ: С. Васильев-Борогонскай аатынан Хоноҕордооҕу сүрүн оскуола, Уус-Алданнааҕы техникум, Хоноҕордооҕу “Түһүлгэ” СК коллективтара историяны кэрэһэлиир- сырдатар быыстапка туруоран эҕэрдэ нүөмэринэн кыттан сомоҕолоһуу баарын көрдөрдүлэр.
Үлэлэриттэн, күннээҕи түбүктэн быыс булан кыттар уус-уран самодеятельность кыттыылаахтарыгар, үҥкүүһүт ыччаттарбытыгар, ырыаһыт далбардарбытыгар, бука барыгытыгар махтанабыт! Бары бэйэ-бэйэбитин харыстаһа сылдьыаххайыҥ! Чэгиэн-чэбдик туруктаах бар дьон буолуоххайыҥ! Тыа сирин олоҕун сэргэхситэр, дьону-сэргэни сомоҕолуур элбэх тэрээһиннэри тэрийиэҕин, оҥоруоҕун! Дьоллоох, доруобай сылдьын!
“Көрсүөххэ диэри, күндү көрөөччүлэр!”
Балаһаны бэлэмнээтэ Суоттутааҕы “Мичээр” СК уус уран салайааччыта Устинья Борисова
