Надежда Федорова салайааччылаах В.П. Свинобоев аатынан Суоттутааҕы норуодунай тыйаатыр Николай Якутскай «Адаҕа» романынан испэктээгин Мүрү нэһилиэгэр «Тойон Мүрү» култуура дыбарыаһыгар оонньоото.
Бу испэктээк кулун тутар 25 күнүгэр – Култуура үлэһиттэрин күнүгэр Суоттуга сүрэхтэммитэ. Испэктээк режиссера Надежда Федорова тоҕо бу айымньыны талан туруорбутун туһунан маннык эттэ:
– Ханнык баҕарар үйэҕэ сөп түбэһэр ис хоһоонноох диэн талбытым. Улахан айымньыны талан туруорарбар эдэркээн кэллиэгэм Мария Андросова сценарийын оҥорон, хас биирдии көстүүмү, атрибуту булан-талан уус-уран салайааччы быһыытынан улахан көмөнү оҥордо. Үлэлиир кэлэктииппэр сүбэ-ама буолалларыгар махтанабын. Артыыстарым олус үчүгэйдик ылсан, анаммыт оруолларын толорон көрөөччүлэр ытыстарын тыаһынан биһирэнэн долгуйдубут.
Тыйаатыр абылаҥнаах эйгэтигэр 39-с сылын куустарбыт Суоттутааҕы норуодунай тыйаатыр «Адаҕа» курдук уустук айымньыны биир кылгас испэктээккэ хайдах курдук бүтүн суолтатын, санаатын, тыынын киллэрэн көрдөрбүтүн кэлбит дьон ытыс тыаһынан кэрэхсэбиллэрин, махталларын тиэртилэр.
