Уус-Алдан улууһугар Олоҥхо, хомус декадатын чэрчитинэн, биллиилээх тойуксут, саха театрын артыыһа Николай Тимофеевич Алексеев төрөөбүтэ 100 сылынан “Дьиэрэй” фольклорнай конкурска улууспутугар үгэс быһыытынан толоруллар фольклор көрүҥнэрин илдьэ сылдьар ансамбыллар, биирдиилээн толорооччулар кытыннылар. Кылыһахтаах кэрэ куоластар, уус-уран тыллаах ырыаһыттар, дьүрүһүйэр хомус тыаһа Олоҥхо дьиэтигэр бииртэн-биир кэрэ тыаһы таһааран көрөөччү кутун туттулар. Суоттубут нэһилиэгиттэн “Туой” бөлөх, салайааччы Устинья Борисова күргүөмүнэн хомус тыаһатан, тойуктаан-ыллаан ситиһиилээх кэллилэр. Норуот ырыатын толоруу түһүмэҕэр Людмила Ефимова “Алгыс ырыа” дэгэрэн ырыанан кыттан II үрдэл хаһаайыттарынан буоллулар. Ситиһии сиэттиһэн кэлэн истин, эһиги ыллыыр алгыскыт дорҕооно, доҕуһуола үтүөнү эрэ түстээтин, үчүгэйи эрэ аҕаллын!
