Ыам ыйын 9 күнэ — үрдүк өрөгөй күнэ!
Улуу Кыайыы күнүгэр Суотту нэһилиэгин дьоно-сэргэтэ үбүлүөйдээх 80 сылы уруйдуу көрүстүбүт. Чаҕылхай күннээх сарсыарда Кыһыл Кырдал ытык сиригэр ытыктабыллаах ветераннарбыт, үүнэр көлүөнэ ыччаппыт кыттыылаах Кыайыы күнүгэр аналлаах үөрүүлээх миитин ыытылынна, салгыы Кыайыы күнүнэн репортажтаан «Сулус» өйдөбүнньүккэ сылдьан, олохтоох дьаһалта дьиэтиттэн «Өлбөт үйэлээх полк» Бүтүн Россиятааҕы акцияҕа кыттыһан үлэ тэрилтэлэрэ, нэһилиэкпит олохтоохторо сэлэлии хааман «Батас» пааматынньыкка тиийдибит. Тэрилтэлэр коллективтара ох курдук оҥостон өрө күүрүүлээхтик колоннанан Кыайыы параадыгар кытыннылар. Улуу Кыайыы ньиргиэрдээх параадын санатар сэлэлээн хаамыыга Ленинградскай уонна Прибалтийскай фрону көрдөрөр Суотту орто уопсай үөрэхтээһин оскуолатын учууталларын уонна үөрэнээччилэрин, оскуола Бүтүн Россиятааҕы оҕо-ыччат байыаннай-патриотическай общественнай хамсааһынын колонната (дириэктэр И.М. Петухова) бастаата, салгыы
Карельскай фрону Суотту нэһилиэгин олохтоох дьаһалтата, С.С. Васильев-Борогонскай аатынан Хоноҕор сүрүн оскуолата (дириэктэр О.В. Фёдорова), Суоттутааҕы врачебнай амбулатория (кылаабынай быраас Пономарёва Т.И.) уонна тыа хаһаайыстыбатын тэрилтэлэрэ (салайааччылар В.П. Мухин, М.А. Черкашин) көрдөрдүлэр.
Белорусскай фрону Дьиэ-уот коммунальнай хаһаайыстыбатын Уус Алданнааҕы филиалын Суоттутааҕы учаастагын (салайааччы Н.Н. Черкашин), «Доҕордоһуу» Өлүөнэтээҕи Государственнай история, архитектура түмэлин (генеральнай дириэктэр С.С. Охлопков-Айым) коллективтара, Уус Алданнааҕы техникум устудьуоннара (дириэктэр А.В. Стрекаловскай) көрдөрдүлэр. Кустук» оҕону сайыннарар киин (сэбиэдиссэй М.Н. Спиридонова) уонна Суоттутааҕы баһаарынай чаас (салайааччы Н.Н. Местников) коллективтара Холбоһуктаах оркестры көрдөрөн хаамтылар.
Колонналар көрдөрүүлээх хаамыыларын кэнниттэн өйдөбүнньүк болуоссатыгар Кыайыы күнүгэр аналлаах үөрүүлээх миитин, ветераннарга Кыайыы 80 сылынан үбүлүөйдээх бэлиэлэри туттарыы, нэһилиэк баһылыгын В.П. Баишев, Россия Геройа М.М. Стрекаловскай уола М.М. Стрекаловскай, буойун интернационалист, Афганистан сэриитин ветерана С.В.Черкашин, нэһилиэк ветераннарын Сэбиэтин бэрэссэдээтэлэ Е.И. Свинобоева, сэрии кэмин оҕолорун ааттарыттан М.Н. Абрамов эҕэрдэ тыллара, бырааһынньыктааҕы кэнсиэр ыытылынна, Кыайыы вальсын үҥкүүтэ дьиэрэйдэ.
Үбүлүөйдээх бэлиэ күҥҥэ Кыайыы параадыгар тэринэн кэлэн көхтөөхтүк кыттыбыт убаастабыллаах нэһилиэкпит тэрилтэлэрин салайааччыларыгар, бары үлэһиттэригэр, үүнэр көлүөнэ ыччаттарбытыгар барҕа махталбытын тиэрдэбит.
Уруйданнын Улуу Кыайыы күнэ!
Айхалланнын Улуу Кыайыы 80 сыла!
Ким да умнуллубат! Туох да умнуллубат!
