«Мичээр» СК-гэр нэһилиэк культуратын, тыа хаһаайыстыбатын үлэһиттэрэ уонна урбаанньыттар холбоһуктаах кэнсиэрдэрэ фестивалы бастакынан арыйда. Бу киэһэ көрөөччү болҕомтотугар сонун нүөмэрдэрдээх истиҥ кэнсиэр буолан ааста. Фестиваль бастакы кэнсиэрэ буолан, кыттааччыларга да, сыаналыыр дьүүллүүр сүбэҕэ да олус долгутуулаах буолла.
Фестиваль балаһыанньатын ирдэбилинэн 11 булгуччулаах нүөмэр туруорулунна, итиэннэ «Доҕордоһуу үҥкүүтэ» соһуччу нүөмэр тахсан, дьон биһирэбилин ылыан ылла. Кэнсиэри хомоҕой тылларынан иилээн-саҕалаан ыыттылар «Лена» ТХПК бэрэссэдээтэлэ Мирослав Черкашин, «Уйгулаах алаас» маҕаһыын атыылааччыта Лилия Аммосова уонна «Мичээр» СК методиһа Екатерина Татаринова. Кэнсиэри сыаналаатылар: бэрэссэдээтэл СК уус-уран салайааччыта У.А. Борисова, «Доҕордоһуу» түмэл сүрүн специалиһа Л.С. Степанова уонна Хоноҕор сүрүн оскуола-уһуйаанын иитээччитэ С.П. Фёдорова. Кэнсиэрдиир киэһэ түмүгүнэн Чабырҕахсыттар бөлөхтөрө, кэрэ куоластаах ырыаһыттарбыт — тыа хаһаайыстыбатын сүрүн специалиһа Зоя Заровняева, «Үрүйэчээн» маҕаһыын хаһаайката Степанида Бурнашёва сольнай нүөмэрдэрэ, урбаанньыт Нюргуяна Киренская уонна культура үлэһитэ Мария Андросова дуэттара лауреат аатын ыллылар. Фестивальбыт муус устар 25 күнүгэр диэри салгыы ыытыллар, кэнсиэрдэртэн киирбит үп Кыайыы күнүгэр аналлаах тэрээһиннэргэ туттуллуоҕа.
Кэрэ кэнсиэри бэлэхтээбит бары кыттааччыларга, ытыс тыаһынан өйөөбүт күндү көрөөччүлэрбитигэр барҕа махталбытын тиэрдэбит. Бары түмсүүлээх буолуохха, эйэ, дьол тосхойдун!
