Бу айымньы уустук, киһи ылбычча өйдөөбөт ол гынан баран, режиссер ону тэттик-тэттик көстүү оҥорбута, айымньыны көрөөччүгэ илдьиритэн, судургутутан оҕо да киһи өйдүүр гына көрдөрдө. Айымньы геройдара табыллан талыллыбыттар курдук көрдүм, манна икки эпизод, сүрүн герой суобаһыгар бу сундуук адаҕа буолуута уонна суобаһын киртиппитин кэмсиниитин көстүүтүн режиссер абстрактнай-психологическай форманан көрдөрбүтэ көрөөччүнү толкуйдатара табыллыбыт…
Үтүө санаа, ымсыы санаа киирсиилэрэ, киһи быһаарыныы ылыныыта уонна оҥорбут алҕаһын билиниитэ. Бу айымньы билиҥҥи кэмҥэ ыччаты иитэр-үөрэтэр, актуальнай. Урукку былыргы кэмҥэ да, аныгы үйэ да кэмигэр суобас диэн хайдах буолуохтааҕа, туохха көстөрө, киһини толкуйдатар айымньыны режиссер туруорбута кэрэхсэбиллээх. Спектакль көрөөччүнү сылаппат, бииртэн-биир көстөр хартыына угуйан иһэр, эмиэ да сүрүн геройу аһыныы, эмиэ да кини байбытыгар үөрүү, көрөөччүнү биир тыыҥҥа тутан, омсолоох герой салҕыы туох быһаарыныыны ылар эбитий, хайдах дьылҕаланыай диэн долгута олорор.
Бары кыттыбыт артыыстарга үтүө спектаклы бэркэ оонньоон, айымньы ис хоһоонун биэрбиттэригэр, туруорбут режиссер сыралаах үлэтигэр махтанабыт! Маннык, саха литературатын баараҕай суруйаачыларбыт үтүөкэн айымньылара көстө турара буоллар диэн баҕа санаа иитиллэр…
